भाकरीच्या तव्यावर उमटले उद्योजकतेचे ठसे!
अरे संसार संसार, जसा तवा चुल्ह्यावर, आधी हाताला चटके तेव्हा मिळते भाकर! बहिणाबाई चौधरींच्या या ओळी आठवतात का? संसाराचा गाडा ओढताना येणाऱ्या अडचणी, कष्ट आणि त्यातून मिळणाऱ्या सुखाचे किती समर्पक वर्णन बहिणाबाईंनी केले आहे! त्यांच्या कवितेतला तवा हा संसारातील संघर्षाचे प्रतीक आहे. मात्र, नवी मुंबई परिसरातील भाकरी व्यवसाय करणाऱ्या महिलांकडे पाहिले की या ओळींना एक वेगळाच अर्थ प्राप्त होतो. इथे महिला केवळ कुटुंबासाठी भाकरी थापत नाहीत, तर उद्योजकतेच्या वाटेवर स्वतःच्या हाताला तव्याचे चटके सोसत आहेत. या चटक्यांतून त्यांना मिळतेय ती केवळ भाकरी नव्हे, तर आर्थिक स्वावलंबन, आत्मविश्वास आणि स्वतःची ओळख! दरवर्षी १९ नोव्हेंबर हा दिवस जागतिक महिला उद्योजकता दिन म्हणून साजरा केला जातो. महिलांच्या व्यावसायिक योगदानाचा गौरव करणे, त्यांच्यातील नेतृत्वक्षमता आणि कल्पकतेला प्रोत्साहन देणे हा या दिवसाचा उद्देश आहे. २०१४ मध्ये न्यूयॉर्क येथील संयुक्त राष्ट्रांच्या मुख्यालयात या दिवसाचा पहिला जागतिक कार्यक्रम आयोजित करण्यात आला होता. जगातील १४४ देशांनी या उपक्रमा...